Ҫӗнӗ Шупашкарти «Химпром» предприятири икӗ пысӑк пуҫлӑха йӗрке хуралҫисем тытса чарнӑ. Кун пирки CHEB.ru портал пӗлтернӗ.
Тытса чарнисенчен пӗри – коммерци директорӗ Алексей Федотов, тепри – предприятин хушма предприятийӗн, «РусХимтрейд» суту-илу ҫурчӗн гендиректорӗ Евгений Герасимов. Вӗсен тӗлӗшпе РФ Пуҫиле кодексӗн 204 статйипе (ку статья коммерци подкупӗ тенине пелтерет) пуҫиле ӗс пуҫарнӑ. Вӗсене ӗс вырӑнӗпе усӑ курнӑ тесе шухӑшлаҫҫӗ.
Ӗҫе малтанласа Чӑваш Енӗн Шалти ӗҫсен министерствин ӗҫченӗсем «Химпромӑн» хӑрушсӑрлӑх службин материалӗсене тӗпе хурса тӗпченӗ.
Евгений Герасимов 2020 ҫулсен варринче Чӑваш Енӗн промышленность тата энергетика министрӗ пулса та ӗҫленӗ.
Ҫӗнӗ Шупашкарта пурӑнакан 67 ҫулти арҫын ултавҫӑсене 60 миллион тенкӗ куҫарса панӑ.
Пӑтӑрмах ҫу уйӑхӗн 23-мӗшӗнче пуҫланнӑ. Ҫавӑн чухне ун патне домофонсене пӑхса тӑракан организаци ҫынни текен этем шӑнкӑравланӑ. Ҫӗнӗ уҫӑ илме смс-ҫырури кода ыйтнӑ. Арҫын кода каланӑ.
Унтан хайхипе Росфинансмониторингпа Федерацин хӑрушсӑрлӑх службин ӗҫченӗ текенсем ҫыхӑннӑ. Унпа форма тӑхӑннӑ улитавҫӑсем те видеооҫыхӑнупа калаҫнӑ, вӗсем арҫын укҫа ҫухатасран пӑшӑрханнине пӗлтернӗ. Ятарлӑ службӑсемпе калаҫма урӑх телефон та туянма сӗннӗ.
Арҫын темиҫе кунта 60 миллион тенкӗ ытла такамсене куҫарса пана, лешсем укҫа Тӗп банкри ятарлӑ счет ҫинче упранать тесе суя справка та ярса панӑ.
Улатӑр тӑрӑхӗнче Сӑр юханшывӗнче 12 ҫулти хӗрача путса вилнӗ. Ку инкек ҫӗртме уйӑхӗн 1-мӗшӗнче пулнӑ. Унӑн виллине халӗ те тупайман, шыраҫҫӗ.
Аса илтерер: нумаях пулмасть Канаш округӗнчи Сухайкасси пӗвинче 17 ҫулти ҫамрӑк путса вилнӗччӗ. Унччен маларах Атӑлта ГЭС ҫывӑхӗнче 49 ҫулти арҫыннӑн пурнӑҫӗ татӑлнӑ. Вӑл Ҫӗнӗ Шупашкартан пулнӑ.
Ӗнер каҫхине Канаш округӗнчи Сухайкасси ялӗ ҫывӑхӗнчи пӗвере 17 ҫулти каччӑ путса вилнӗ. Унӑн виллине водолазсем шыраса тупса ҫыран хӗррине илсе тухнӑ.
Аса илтерер: нумаях пулмасть Атӑлта ГЭС ҫывӑхӗнче 49 ҫулти арҫын путса вилнӗ. Вӑл Ҫӗнӗ Шупашкартан пулнӑ.
Ҫӗнӗ Шупашкарти 55-мӗш маршрутпа ҫӳрекен троллейбуса Леонид Шевницын ятне панӑ. Вӑл «Химпром» директорӗ пулнӑ.
Ку маршрут – ҫӗнӗ. Кӑҫал «Химпром» йӗркеленнӗренпе 65 ҫул ҫитет. Ҫавна май Леонид Шевницын ячӗллӗ 55-мӗш троллейбуса маршрут ҫине кӑларма йышӑннӑ. Ун ҫинче унӑн портречӗ пулӗ.
Троллейбус Ҫӗнӗ Шупашкарти тӗп урамсемпе тата тата иртнӗ ӗмӗрӗн 70-мӗш ҫулӗсенче «Химпромӑн» производствӑри ӑнӑҫӑвӗсене халалласа йӗркеленӗ 10-мӗш Пилӗкҫуллӑх урамӗпе кайӗ.
Ҫӗнӗ Шупашкарта пурӑнакан Ольга Савинова Мускавра ҫӗртме уйӑхӗн 1-6-мӗшӗсенче иртекен илем тата амӑшлӑх «Раҫҫей Тӗнче миссисӗ» конкурсӗнче Чӑваш Ен чысне хӳтӗлӗ. Унта Раҫҫейри 18-60 ҫулсенчи качча кайнӑ 150 хӗрарӑм хутшӑнать.
«Чӑваш Енре ҫуралса ӳснӗшӗн эпӗ яланах мухтаннӑ. Тӑван чӗлхене, культурӑна, несӗлсен йӑли-йӗркине чунран юрататӑп», - тет Ольга Савинова. Вӑл Чӑваш Ен чысне тӗнче шайӗнче хӳтелеме чыс лекнӗшӗн хӗпӗртенине палӑртнӑ.
Ҫӗртме уйӑхӗн 1-мӗшӗнчен Ҫӗнӗ Шупашкартан Шупашкара ҫӳрекен 61-мӗш троллейбус кӑштах маршрутне улӑштарӗ. Троллейбуссем «Шупашкар» суту-илӳ центрӗ патӗнчен Эгер бульварне, Ҫӗнӗ автовокзал енне, пӑрӑнмӗҫ, 9-мӗш Пилӗкҫуллӑх проспекчӗпе кайса «Пичет ҫурчӗ» патӗнчен иртӗҫ. Малалла хальхи маршрутпах кайӗҫ.
Маршрут ҫинче 14 троллейбус ӗҫлет. 2 транспорт резервра пулмалла. Аса илтерер: вӑл Ҫӗнӗ Шупашкарти «Иваново» микрорайона Шупашкарти Медицина центрӗпе ҫыхӑнтарать.
Ҫӗнӗ Шупашкарти «Химпром» предприяти ӗҫченӗсене хисеплӗ ят пама йышӑннӑ.
«Чӑваш Республикин промышленноҫӑн тава тивӗҫлӗ ӗҫченӗ» ята хими оборудованине юсакан 75-мӗш цех пуҫлӑхне Сергей Ермошина, ЭТС-40 производство уйрӑмӗн мастерне Александр Кожанова, 71-мӗш цех пуҫлӑхне – директорӑн производство енӗпе ӗҫлекен ҫумне Евгений Мигунова, 62-мӗш цехӑн мастерне Валерий Нестерова парас тенӗ.
Предприятин тӗп казначейӗ Майя Пыркина вара «Чӑваш Республикин тава тивӗҫлӗ экономисчӗ» пулса тӑнӑ.
«Ҫулталӑкри вӗрентекене» палӑртнӑ. Ку ята Куславккари Алевтина Алексеева тивӗҫнӗ.
Кӑҫал конкурса 1000 ытла ҫын хутшӑннӑ, 218 специалист куҫӑн майпа иртнӗ тӗрӗслев витӗр тухнӑ.
«Ҫулталӑкри воспитатель» — Дарья Жгарь (Шупашкар), «Чи лайӑх класс ертӳҫи» — Юлия Дельян (Ҫӗнӗ Шупашкар), «Ҫулталӑкри педагог-психолог» - Татьяна Анилина (Куславкка районӗнчи Тӗрлемес шкулӗ), «Ҫулталӑкри социаллӑ педагог» - Яна Молодцева (Шупашкар), «Чи лайӑх учитель-дефектолог» - Татьяна Гаранина (Ҫӗнӗ Шупашкар), «Чи лайӑх тӑван чӗлхе учителӗ» - Ираида Матьянова (Шупашкар), «Сывлӑх енчен хавшак ачасемпе ӗҫлекен чи лайӑх педагог» - Ирина Петрова (Йӗпреҫри интернат шкул), «Ҫулталӑкри чи лайӑх тьютор» - Наталия Прагуськина (Шупашкар), «Ҫулталӑкри чи лайӑх методист» - Ксения Коллэ (Шупашкар), «Педагогика дебючӗ» - Игорь Ятмаскин (Шупашкар).
Чӑваш Енӗн Правительствинче тунтикунсерен иртекен ӗнерхи планеркӑра ҫуллахи кану тапхӑрне епле хатӗрленнине те сӳтсе явнӑ.
Кӑҫал пирӗн республикӑра 8 пляж уҫасшӑн, вӗсенчен 5-шӗ Шупашкарта пулӗ, пӗрерӗшӗ — Ҫӗнӗ Шупашкарта, Куславккапа Етӗрне тӑрӑхӗсенче. Унсӑр пуҫне ҫынсене канмалли 120 ытла вырӑн хатӗрлемелле.
«Часах шӑрӑх ҫанталӑк пуҫланӗ, ҫӗртме уйӑхӗн 1-мӗшӗ хыҫҫӑн ҫынсем пляжсене кайма пуҫлӗҫ. Вӗсене хӑвӑртрах хатӗрлесе ҫитермелле», — хушса каланӑ республика ертӳҫи Олег Николаев.
+27.3 °C